دلم تنگه سی عید و سی فرودین که خندون و سوزن زمان و زمین
وهنگام آغاز گردیدن سال نو وتن کردن کهنه و دلگ نو
وسرگشتن دوره انتظار گل سرخ و آغاز فصل بهار
بچه بازیل دوره کودکی ودندون گرتن جره مشتکی
جکسن به دنبال هم در چمن الختر و گرنا و دشت و دمن
گرتن کت تومون دای خویش و سی رهتن هونه قوم و خویش
دلم تنگه لالایی وقت خو تماشای لبخند زیبای بو
نشسن پس درس و مشق و کتاب شدن بیس در درس سخت حساب
پسینل زر نور کم رنگ روز که زردیش بر داشت داده بروز
همه مشق خود را نموده تمام به هنگام تاریکی قبل شام
صدای درای ورندیل و گا که پیچیده هنگام شب در هوا
دلم تنگه سی شویله روشت پاک که مه کرده بی چهره شه تابناک
همه دوره یک،گرد سینی شله دل شاد و سرشار از ولوله
. صدی گاله و شک شلق من سخوس وپاتیل جوشان روی چلوس.
یه چاله تش و جملگی دور او متیل و گپ و قصه و گفتگو.
دلم تتگه سی موردل و دو دوور سرچال و گل زردل پاکمر.
من آخر هفته بارو کنار و طعم گس و رنگ سرخ کنار.
دلم تنگه پیون کنار جووه اسیر زلالیه او سردووه.
وفرسنگ کرتاته و خورزووه و تشنه یه لیوان رویی دووه.
و گزگل و خرزهله بی رووه و سوتکل سوز هیبی جووه.
دلم تنگه سی موجل تنگ شیو و سی قصه شیتر و دال و دیو.
دلم تنگه سی ماس و دو و کره بهار،چهره و پشم میش و بره،
تپو ،اعنه و تنگسه تنگ سه و دم کردن چی منهکتر سه.
دلم تنگه سی تخت و سی پشه گیر و هنگام مرداد و هنگام تیر.
تماشی یه دنیا ستاره منه آسمون به هنگام خوی سرپشت بوم.
درو گندم و بافه تیغ داس نشسن و چی خردن وقت چاس.
دلم تتگه هور گنی و جخون دل شاد هنگام گندم برون.
عروسی و تنبک و ساز و شپک دلم تنگه دل دادن بی کلک.
دلم تنگه چادر دلم تنگه دار دلم تتگه یار و دلم تنگه پار.
دلم تنگه سی یک دهن دی بلال صدای کل و گاله دور مال
الختر و سورنا و گرنا و گو تلاش و هیاهوی خرد و گپو.
سواران بی باک برنو و کول و مازه زرآورد تا کوه دول.
هوای بهاری و اسب کهر زدن پهنه دشت و سینه کمر،
دووسن و دنبال کره شکال من کوه سرچشمه پای تفال.
دلم تنگه سی دایل هی کمک و سی کلگ و دوشو و میز و گمک.
دلم تنگ بنگک دلم تنگ رو به قربون او جرل روبرو.
دلم تنگه سی باغل دور ده پر از نار و انگور و انجیر و به.
دلم تنگ دول چل مشکلی ودنبال گو بازی و چککلی.
دلم تنگ داهول و کیفار و برد مه مهر و چلتیکل زرد زرد.
دلم تنگ سی طاقل خلخلی دووسن من کیچیل شلشلی.
نشسن من ورد بینی مال تماشای ناز گل تیه کال.
دلم تنگه سی ماهیل من کره شرینی وشادابی و سرخی تیدره،
کشاورزل سختکوش و سور کری سه و زرده و جوی نور.
دلم تنگه دووسن من حرار و دنبال تیله خرگوشل من فرار
.دلم تنگ سی مرغ گل باقلی عمارتل و قله سرتلی.
دلم تنگه سی نون و کلگ و بلی نشسن زر سایه دارل من دلی
. دلم تنگ رنجک و تیشه تور دم عید و باوینه و کارده من کمر
. دلم تنگ سی خاک پاک وطن مراسخون آباد و زیبای من.
همی مردم خوب و پر از صفاش تمیزی و پاکی آب و هواش.
دلم تنگه سی هرچه او دوره بی و سی هرچه وابی و سی هرچه بی
